Farið hefur fé betra

Maður hlýtur að gleðjast þegar þingmenn Framsóknarflokksins ákveða að draga sig í hlé.

Hjálmari Árnasyni var hafnað af flokksmönnum í prófkjöri, Guðni hlaut afgerandi kosningu í efsta sætið. 

Það verður seint sagt að það sé sjónarsviftir af Hjálmari,  enda seint talin skörungslegur í starfi.

Miðað við það ógagn sem framsóknarþingmenn hafa í gegnum tíðina unnið landi og þjóð, þá má kanski segja að þetta sé með betri eftirmælum sem einn úr þeirra röðum geti fengið.

Hjálmari býður nú mikið verk: Að sættast við samvisku sína vegna þeirra starfa sem hann hefur sinnt síðastliðin 12 ár. 

Óska ég honum velfarnaðar í því.

Nefskattur

Ríkisstjórnin hefur viðrað hugmyndir um nefskatt til að standa straum af rekstri RÚV.     Þessi hugmynd eins og aðrar sem komið hafa fram í sambandi við RÚV, sýna svo ekki verður um villst að Þingmenn eiga erfitt með að hugsa út fyrir rammann; það hefur alltaf verið til ríkisrekin flokks fjölmiðill- og því þarf alltaf að vera til ríkisrekin flokks fjölmiðill. 

Það að komið sé fram á 21. öldina á greinilega ekki að hafa nein áhrif á stefnu ríkisstjörnarskrímslisins.

Hafi einhver tíma verið aðkallandi að endurnýja á vinnustað þá er það á Alþingi.                      

Við erum samt efstir !

Það var ekkert ýkja gaman að sitja við hliðina á breskum Arsenal-manni niðri á Glaumbar í dag og ég man ekki eftir að hafa áður flýtt mér svona út eftir leik.  8 klst.  síðar er ég ennþá hundfúll en reyni samt að sjá það jákvæða við þetta.  Deildin er jú meira spennandi þegar Chelsea, Liverpool og Arsenal eiga öll möguleika á öðru sætinu.

 

b5-orðabókin

Orðfæri vinnufélaga minna á b5 er ærið sérstakt.  Öll eru þau íslensk og ekkert þeirra er undir tvítugu, en samt tala þau gjarna eins og erlend börn sem eru að gera sitt besta í íslensku máli.

Ég tók saman nokkur dæmi um þau gullkorn sem ég hef heyrt undanfarið, þýðingar fylgja með í svigum:

flaskan er óopin (lokuð)

hnífurinn er rosalega óbeittur (bitlaus)

 kössóttur diskur(ferhyrndur)

ísinn er frosnaður (frosinn)

það er þrælt manni út hérna (þrælað)

og snilldar setningin : þetta snýst um mýkleika (mýkt)

Óneitanlega verður mér hugsað til íslensku kennarans, sem setti óvart í gang þjófavarnarkerfið í skólanum, þegar hún sláaði inn rangan kóda. (Hennar eigin orð).